ఇప్పుడు కావాల్సింది కొన్ని అక్షరాలు కాదు
పిడికెడు ప్రేమను పంచే కొన్ని మాటలు...!!
అవును నిండు పున్నమి వెన్నెల ఎంతో అందంగా కనపడొచ్చు
అంతకంటే అందమైనది అమ్మ మనసు ఎప్పుడైనా తెలుసుకునే ప్రయత్నమైనా చేసావా?
నిజానికి అమ్మ అందంగా లేదని
మా అమ్మ అని చెప్పుకోలేని
కుమారులు,కుమార్తెలు కూడా నివసించే సమాజం ఇదని మర్చిపోవద్దు
అమ్మ విషయంలో ఆత్మానుసారంగా ప్రేమించాలి
అందాన్ని ప్రాతిపదికగా తీసుకొని కాదు...!!
కన్న పిల్లలు అందంగా లేకపోయినా
అవిటివాళ్ళయినా ఒకే రకంగా ప్రేమను పంచుతుంది అమ్మ
ఎందుకంటే అమ్మ ప్రేమలో కొలమానాలు ఉండవు
ప్రేమనే పదానికి సరైన నిర్వచనమే అమ్మ...!!
చెప్పడంలో గొప్పతనం చూపించకండి
చేతల్లో గొప్పతనం ప్రదర్శించండి
కూటికి దూరమై
కాటికి దగ్గరవుతున్న
కన్న తల్లులను కసాయి వాళ్ళలా
వృద్ధాశ్రమాలకు అమ్మే పిల్లలెందరో...
అమ్మ మనకు భారమవుతుందా
అమ్మ మనలను ఏం అడుగుతుంది...?
అమ్మ నోరు తెరిచి ఏమీ అడగదు
నువ్వు తనకోసం చిన్న పని చేసినా
అంతకు వెయ్యి రెట్లు ఆనందపడుతుంది అమ్మ...!!
అప్పుడప్పుడూ నీ సంపాదనలోనుండి
అమ్మకు తను ఆనందపడే కానుకలు కొని ఇవ్వండి
తనకు ఇష్టమైన భోజనంతో కడుపు నింపండి
పాలకోసం మనం ఏడిస్తే తల్లడిల్లిన తల్లిని
ఇప్పుడు ఆకలి కోసం తల్లడిల్లే పరిస్థితి తీసుకురాకండి...!!
పరితపిస్తూనే ఉంటుంది ఆ పేద హృదయం
కన్నీళ్ళను తుడిచే పిల్లల హస్తాల కోసం
మనసు బాధను పంచుకునే సమయం కోసం...
పిచ్చి తల్లి తన గోడు చెప్పుకోవడానికి
కన్న బిడ్డలు దగ్గర లేకపోవడంతో
తనలో తానే
తనతో తానే
ఎప్పుడూ మాట్లాడుకుంటూనే ఉంటుంది...!!
మన కోసం తన సర్వస్వాన్ని త్యాగం చేసిన తల్లి కోసం
మనం త్యాగం చేయడానికి కొన్ని క్షణాలు ఉండవు
ఎంత దౌర్భాగ్యమో కదా...?
సమయం లేక కొందరు
సమయం ఉన్నా పట్టించుకోక కొందరు
ఒక్కరోజు అమ్మకి కేటాయించి మాతృదినోత్సవమని శుభాకాంక్షలు చెప్పుకుంటున్నాము
అసలు అమ్మ లేకుండా ఈ జీవితం మనకుందా?
అమ్మే లేకపోతే నువ్వు నేను ఈ ధరణిలో శ్వాసించే వాళ్ళమా?
ఈ ఒక్కరోజు ఎందుకంటే కనీసం ఈ ఒక్కరోజైనా అమ్మ ప్రేమను
అమ్మ విలువను
అమ్మ గొప్పతనాలను
అమ్మ త్యాగాలను మర్చిపోయిన వారందరూ ఒక్కసారి ఆత్మపరిశీలన చేసుకోవాలని...
ప్రేమకు ప్రతీక అమ్మంటే
అందుకే అమ్మకు అందరికంటే ఉన్నతమైన స్థానాన్ని కేటాయించింది
"కన్నతల్లి కడుపు నింప చేతగాని వాళ్ళు
దేవుని హుండీలు నింపే వెర్రివాళ్ళు"
సమస్త దేవతలు అమ్మలోనే ఉన్నప్పుడు
ఎక్కడెక్కడికో పూజించడం ఎందుకు...?
ఇంట్లో ఉన్న ఆ దేవతను ముందు పూజించు
గుడి చుట్టూ పొర్లు దండాలు పెడుతూ
ఎన్నో కోరికలు కోరుకుంటారు...
ఎన్నెన్నో ప్రదక్షిణలు చేస్తూ ఉంటారు
ఎప్పుడైనా ఒక్కసారి
అమ్మ కాళ్ళకు మొక్కి ఆశీర్వాదం తీసుకున్నారా?
ఎవరికివారు ప్రశ్నించుకోండి అంతే...!!
అమ్మ ప్రేమ ఎప్పుడూ ఒక ఎండ్ లెస్ స్టోరీ
ఆది మాత్రమే ఉంటుంది అంతం ఉండదు
అమ్మ ప్రేమ ఒక జీవనదిలాంటిది
అది నిరంతరం ప్రవహిస్తూనే ఉంటుంది...
కాలాలు మారుతాయి
అమ్మ ప్రేమ గురించి ఎంతో అందంగా వర్ణించే
కవులు / కవయిత్రులు మారుతూ ఉంటారు
అమ్మ ప్రేమ మాత్రం శాశ్వతంగా వికసిస్తూనే ఉంటుంది
చరిత్రలో...వర్తమానంలో...భవిష్యత్తులో
చిరస్థాయిగా వెలుగుతూనే ఉంటుంది అమ్మ ప్రేమ...!
కామెంట్లు
కామెంట్ను పోస్ట్ చేయండి